الجمع العام اللي تعقد لبارح الجمعة، بملعب بوبكر عمار، كرس حاجة واحدة، هي أن جمعية سلا فرقة مختطفة، وغتبقى كذلك.
وهذا كافي باش دور فبلاصتها. لبارح كان رهان واحد هو شكون يكون رئيس مكان لا مشروع لا ملامح مشروع النهوض بالفريق.
الرابح الاكبر فالحفلة التنكرية اللي سماوها جمع عام، هو رؤوف بنطالب.
بنطالب وبدعم من شي وحدين كان مسكون بفكرة قجع صغيور فسلا، وطبخو مناخ أزمة مهد الطريق لإعدام مكتب قانوني، و إحداث لجنة مؤقتة، بغض النظر عن أخطاء المكتب ديال عادل الزبيدي ومن معه.
دارت لجنة مؤقتة، و الهدف كان هو إنقاذ الفريق، وهذا عنوان كبير فيه تضليل، حيث هاذ اللجنة كانت تتوجد لما هو أكبر.
التسيير اليومي بين المشاكل و التحديات الكبرى. لجنة مؤقتة خيرت ملايين كثيرة مقارنة مع مكتب منتخب وبعدد قليل من النقط، لذلك بنطالب قرر ينزل من السفينة ولكن مع ضمان التسيير بالوكالة.
علاش على هاذ الشي. باش دوز فترة اللجنة المؤقتة بسلام خاص مكتب على المقاس، وبهاذ المبرر قصاو بزاف ديال المنخرطين، والقاعدة أن الاقصاء كيجر موراه المشاكل، وكيعطي انطلاقة عرجاء.
الجمع العام ديال البارح، الجمعة 25 غشت 2023، عطى تركيبة رباعية تتكون من بقايا عائلة شكري، مع مكونات التحالف الثلاثي اللي كيسير الجماعة، شوية من الاستقلال، و الاحرار و البام.
الناس اللي طبخت الجمع العام، دارت مبغات مكاين لا انخراط لا شرط عامين، و لا شكليات الجموع العامة، و لا مصداقية ديال التقريرين المالي و الادبي و لا هم يحزنون.
اللي كان لبارح توافقات ديال شكون ياخذ الفرقة شكون ياخذ الشركة.
رئيس بصفر خبرة محسوب على مكتب وصفوه بالفاشل، وأعضاء هم جزء من المشكلة الأبدية ديال عائلة المرحوم شكري اللي مازال غارق فيها الفريق، و أعضاء كاينين فالمكتب حيث ملقاو فين يديروهم فالجماعة و لا الجمعيات ديالهم، ولكنهم ثقة كيمثلوا مكونات قررت تحط يديها على لايسيس.
دابا اشنو غيوقع.
رئيس سابق باغي الشركة، واخا دخل لمكتب فريق آخر.
ورئيس عندو حسابات خاصة، و المكتب أهم حاجة عندو هي يحفظ الفريق بوصل قانوني ومن بعد غتبدا نفس الكاسيطة ديال الموارد المالية، و ضعف التعاقدات، ومدرب معندوش إمكانيات تقنية، وجمهور مشتت، و تبخر الوعود وتضاءل الاحلام والطموح، وها لايسيس تدور فنفس الحلقة.
لا نتمنى فشل المكتب، حبا في الفريق، لكن الكتاب يقرأ من العنوان.
ماشي قضية تشاؤم ولكن المقدمات هي اللي كتعطي النتائج و الخلاصات.
وحتى مع تحقيق نتائج و انتصارات محدودة فراه فاقد الشيء لا يعطيه و الحرص ديال ان الفريق ديالنا هذا يدير نسيبو ولاخر ولدو، ولاخر صاحبو او عشيرو فراه منطق الكرة تبدل.
بصحتكم المكتب و بيننا الأيام.